ایران نے امریکا سے مذاکرات جاری رکھنے کے ساتھ ہر ممکن صورتحال کے لیے تیاری کا اعلان کر دیا

تہر ان( مانیٹرنگ ڈیسک)ایران کی پارلیمنٹ کے اسپیکر محمد باقر قالیباف نے کہا ہے کہ تہران امریکا کے ساتھ مذاکرات کا سلسلہ جاری رکھے ہوئے ہے، تاہم بڑھتی ہوئی کشیدگی کے پیش نظر ہر ممکن صورتحال سے نمٹنے کے لیے بھی مکمل طور پر تیار ہے۔غیر ملکی میڈیا رپورٹس کے مطابق انہوں نے ٹیلی ویژن پر نشر ہونے والے بیان میں کہا کہ ایران اپنے مخالفین پر اعتماد نہیں کرتا اور خطے میں کسی بھی وقت صورتحال بگڑ سکتی ہے۔ان کا کہنا تھا کہ ایران دشمن پر بھروسہ نہیں کرتا اور جنگ کسی بھی لمحے شدت اختیار کر سکتی ہے، اس لیے قومی سلامتی کے تقاضوں کو ہر صورت مدنظر رکھا جا رہا ہے۔ایرانی نیم سرکاری خبر رساں ادارے مہر خبر رساں ایجنسی کے مطابق قالیباف نے واضح کیا کہ ایران ایک جانب سفارتی عمل کو جاری رکھے ہوئے ہے جبکہ دوسری جانب ہر ممکن خطرے سے نمٹنے کی مکمل تیاری بھی رکھتا ہے۔انہوں نے مزید کہا کہ موجودہ حالات میں مذاکرات اہم ہیں، لیکن قومی سلامتی کے تحفظ کے لیے ضروری اقدامات سے غفلت نہیں برتی جا سکتی۔ماہرین کے مطابق ایران کی یہ پالیسی جسے “مذاکرات بھی اور تیاری بھی” قرار دیا جا رہا ہے، اس بات کی عکاسی کرتی ہے کہ تہران سفارتی دروازے کھلے رکھنا چاہتا ہے مگر ساتھ ہی کسی بھی ممکنہ تصادم کے لیے اپنی دفاعی تیاری بھی مضبوط رکھے ہوئے ہے۔